Январ ойида АҚШ Адлия вазирлиги томонидан эълон қилинган ҳужжатлар тўпламида Жеффри Эпштейн иши бўйича 90 дан ортиқ ФҚБ тергов протоколлари топилмади. Бу ҳақда CNN хабар бермоқда.
“Гислейн Максвеллнинг адвокатларига тақдим этилган далиллар журналига кўра, иш бўйича, тахминан 325 та шундай протокол мавжуд бўлган. Шундай қилиб, эълон қилинган архивда кўрсатилган рўйхатнинг чорак қисмидан кўпроғи йўқ”, дейилади телеканал хабарида.
CNN тўпламда топа олмаган материаллар орасида Эпштейн уни ўсмирлик чоғидан зўрлаб келганини даъво қилган ҳамда бир неча ўн йил аввал Доналд Трампни жинсий зўравонликда айблаган аёлга оид учта баённома борлиги айтилмоқда.
АҚШ Адлия вазирлигининг таъкидлашича, материалларнинг бир қисми такрорланувчи, ҳуқуқий чекловлар қўйилгани ёки давом этаётган терговга алоқадор бўлганлиги сабабли ҳужжатлар тўпламига киритилмаган бўлиши мумкин.
