Жарима майдончасидан автомобилни чиқаришда электрон рухсатнома олиш тизими жорий этилиши мумкин

Электрон рухсатнома QR-код кўринишида расмийлаштирилади ва ваколатли органлар томонидан автоматлаштирилган тизим орқали текширилади.

Бу борада Вазирлар Маҳкамаси қарор лойиҳаси regulation.adliya.uz порталида жамоатчилик муҳокамасига қўйилди.

Лойиҳага кўра, автомототранспорт воситаларини жарима майдончасидан олиб чиқиш учун энди Давлат йўл ҳаракати хавфсизлиги хизматига анъанавий қоғозбозлик ўрнига Ягона интерактив давлат хизматлари портали (ЯИДХП), Давлат хизматлари марказлари ёки махсус мобиль илова орқали электрон рухсатнома олиш имконияти яратилади.

Янги тартиб фуқароларнинг вақт ва маблағини тежаши, ортиқча оворагарчиликни камайтириши кутилмоқда.

Режага кўра,

• 2025 йил 31 июлга қадар ЯИДХП, Давлат хизматлари марказлари ёки Давлат йўл ҳаракати хавфсизлиги хизматининг мобил иловаси орқали автомототранспорт воситаларини жарима майдончасидан олиб чиқиш учун электрон рухсатнома олиш давлат хизмати йўлга қўйилади;
• жисмоний ва юридик шахслар автомототранспорт воситаларини жарима майдончасидан олиб чиқиш учун электрон рухсатнома олиш юзасидан ДЙҲХХга анъанавий (оғзаки ёки ёзма) тарзда мурожаат қилиши мумкин.

Қайд этиш жоизки, электрон рухсатнома QR-код кўринишида расмийлаштирилади ва ваколатли органлар томонидан автоматлаштирилган тизим орқали текширилади. Бу жараёнда ЯИДХП ҳамда Ички ишлар вазирлигининг ахборот тизимлари ўзаро интеграция қилинади.

Президентнинг ички ишлар органларини рақамли трансформация қилишга оид қарори ижроси доирасида тайёрланган мазкур қарор лойиҳаси фуқаролар ва мутахассислар томонидан кенг муҳокама қилинмоқда.