Жанубий Кореянинг собиқ президенти Юн Сок Ёл қанча муддатга қамалади?

Жанубий Кореянинг собиқ президенти Юн Сок Ёлга нисбатан тўртта жиноий ишнинг биринчиси бўйича 10 йил қамоқ жазоси сўралди — Yonhap.

Жанубий Корея махсус прокурори Сеул марказий округ судида мамлакатнинг собиқ президенти Юн Сок Ёлни суд ишига тўсқинлик қилганлик айби билан 10 йилга озодликдан маҳрум этишни талаб қилди.

Прокурорлар Юн Сок Ёлни 2025 йил январ ойида терговчиларнинг уни ҳибсга олишига тўсқинлик қилишга уринишда айбламоқда. Шунингдек, собиқ президент Вазирлар маҳкамасининг тўққиз нафар аъзосининг ҳуқуқларини бузганликда айбланмоқда, улар ҳарбий ҳолат жорий этиш режасини кўриб чиқиш бўйича йиғилишга чақирилмаган.

Мазкур иш 2024 йил декабр ойида ҳарбий ҳолат жорий этилиши билан боғлиқ тўртта жиноий ишнинг биринчиси ҳисобланади. Юн Сок Ёл 2024 йилнинг декабр ойида мамлакатда ҳарбий ҳолат жорий қилишга уринган. Шундан сўнг, парламент уни қўзғолонга уринишда айблаб, импичмент эълон қилган ва ҳибсга олинган эди.