Исроил Байрутнинг жанубий чеккасига зарба берди

Исроил ҳарбийлари “Ҳизбуллоҳ” жангарисини нишонга олиб, Байрут жанубидаги чекка ҳудудга зарба берганини маълум қилди, деб хабар беради BBC.

— Зарба нишони яқинда ХАМАС жангариларини бошқарган ва уларга Исроил тинч аҳолисига қарши кенг кўламли ва яқиндаги терактни режалаштиришда ёрдам берган “Ҳизбуллоҳ” террорчиси бўлди, — дейилади Исроил мудофаа кучлари ва Шин Бет хавфсизлик хизмати қўшма баёнотда.

Ҳарбийлар “Ҳизбуллоҳ”нинг таянчи ҳисобланган Даҳия ҳудудида “уни йўқ қилиш ва таҳдидни бартараф этиш чораларини кўрганини” маълум қилди. Reuters агентлигининг гувоҳларга таяниб хабар беришича, ҳарбий самолётлар Ливан пойтахти узра пастдан учиб ўтган ва бутун шаҳарда кучли портлашлар эшитилган.

Ўтган ҳафта Исроил ҳарбийлари ноябрь ойида ўт очишни тўхтатиш келишуви кучга кирганидан бери илк бор Байрут жанубига зарбалар берди. Исроил аввалроқ Ливандан иккита ракета учирилганини айтди ва “Ҳизбуллоҳ”ни оташкесимни бузишда айблади.

“Ҳизбуллоҳ” етакчиси Наим Қосим ҳаво ҳужумларининг қайта бошланганини қоралади. Гуруҳ вакиллари Исроил ҳудудини ўққа тутишга алоқадорлигини рад этди.