Ироқ АҚШ санкциялари туфайли "Лукойл"га нефть етказиб беришни бекор қилди

Ироқнинг давлатга қарашли SOMO ноябрь ойида Россиянинг "Лукойл" компаниясига уч партия хом нефть етказиб беришни бекор қилди.

Бу ҳақда Reuters агентлиги хабар берди.

Агентликнинг қайд этишича, бунга АҚШнинг Россиянинг йирик нефть компаниялари, жумладан, "Лукойл"га қарши санкциялари сабаб бўлган. Бекор қилиш "Лукойл" 75% улушга эга бўлган Ироқдаги Ғарбий Курна-2 конидан нефть ташиш билан боғлиқ.

Етказиб бериш 11, 18 ва 26 ноябр кунларига белгиланган эди.

Ўтган ой компания глобал товар савдогар Gunvorдан ўзининг халқаро активларини сотиб олиш таклифини қабул қилганини эълон қилди. Gunvor бош директори Торбьорн Торнквист Financial Times газетасига берган интервьюсида "Лукойл"нинг бутун дунё бўйлаб муаммолари ҳақида гапирганди.

"Лукойл"нинг бутун халқаро операциялари фалаж бўлиб қолган. Улар билан ҳеч ким ҳамкорлик қила олмайди. Кўплаб иш ўринлари хавфь остида, нефтни қайта ишлаш қуввати жиддий равишда бузилиши мумкин", деганди у газетага.

Эслатиб ўтамиз, 23 октябрь куни АҚШ молия вазирлиги Россиянинг "Роснефть" ва "Лукойл" нефть компанияларига қарши қўшимча санкциялар жорий этилишини эълон қилган эди.