Иқтисодиёт ва молия вазирлиги тизимида ТДИУнинг 2 та кафедраси филиаллари очилди

Бугунги глобал рақобат шароитида мамлакат иқтисодий тараққиёти учун малакали кадрлар тайёрлаш – стратегик аҳамият касб этмоқда. Ўзбекистон Республикаси Президентининг тегишли фармон ва қарорларида иқтисодиёт ҳамда молия соҳаси учун замонавий мутахассислар етиштириш зарурлиги алоҳида қайд этилган. Айни шу мақсадда, Тошкент давлат иқтисодиёт университети ўқув жараёнига илғор технологияларни жорий этиб, назария ва амалиёт уйғунлигини таъминлаш борасида қатор ислоҳотларни амалга оширмоқда.

Мазкур ислоҳотларнинг ёрқин намунаси сифатида, Иқтисодиёт ва молия вазирлиги ҳузуридаги Бюджетдан ташқари пенсия жамғармасида университетнинг "Молия ва молиявий технологиялар" ҳамда "Бюджет ҳисоботи ва Ғазначилик" кафедралари филиалларининг ташкил этилишини алоҳида таъкидлаш жоиз.

Ушбу филиаллар:

• Талабаларга тўғридан-тўғри амалий тажриба олиш имконини беради.

• Назарий билимларни реал иш жараёни билан узвий боғлайди.

• Меҳнат бозорига тайёр, иш берувчилар эҳтиёжларига мос мутахассислар етказиб беради.

• Илмий тадқиқот натижаларини амалиётга татбиқ этиш кўламини кенгайтиради.

Очилиш маросимида илм-фан, таълим ва амалиёт интеграциясини мустаҳкамловчи ўзаро ҳамкорлик Меморандуми имзоланди. Бу ҳужжат олий таълим ва молия тизими ўртасидаги алоқаларни янада мустаҳкамлашга хизмат қилувчи муҳим ҳуқуқий асос бўлди.

Хулоса ўрнида айтиш мумкинки, бугунги кунда Ўзбекистонда олий таълим жараёни мустақил тизим эмас, балки иқтисодиёт билан чамбарчас боғлиқ ягона экотизим сифатида шаклланмоқда. Тошкент давлат иқтисодиёт университети мисолида кўрсатилган бу янги ёндашув ўз самарасини бериб, илм-фан ва амалиётни бирлаштирган ҳолда, ҳаёт учун тайёрланган мутахассисларнинг етишиб чиқишини таъминламоқда.

Мадинабону Абдуллаева, ТДИУ катта ўқитувчиси