Озарбайжонда ҳукмрон Янги Озарбайжон партияси 2024 йил 7 февралда бўлиб ўтадиган навбатдан ташқари сайловларда амалдаги давлат раҳбари Илҳом Алиевни Озарбайжон президентлигига номзод сифатида кўрсатди. Бу ҳақда партия раиси ўринбосари Таир Будагов маълум қилди.
«Бўлажак навбатдан ташқари сайловларда бизнинг номзодимиз амалдаги Президент Илҳом Алиев бўлади», деди Будагов журналистларга.
Алиевнинг номзод сифатида расман тасдиқланиши партия бошқарувининг навбатдан ташқари йиғилишида бўлиб ўтади.
Амалдаги қонунчиликка кўра, Озарбайжон Марказий сайлов комиссияси аризачининг ҳужжатларини олган кундан бошлаб беш кун ичида уни ушбу лавозимга тасдиқлаш тўғрисида қарор қабул қилиши керак. Шундан сўнг номзоднинг ўзи ёки у ваколат берган гуруҳлар мамлакат президентлигига номзод сифатида кўрсатилган номзодни рўйхатга олиш учун зарур имзоларни тўплашга киришади. Рўйхатдан ўтиш учун 40 минг сайловчининг имзосини тўплаш керак. МСК ҳужжатларни 19 декабрдан 8 январгача қабул қилади.
Номзодлар фойдасига сайловолди ташвиқоти овоз бериш кунига 23 кун қолганда, яъни 15 январдан бошланади. Сайловга бир кун қолганда сукунат куни эълон қилинади.
7 декабрь куни Алиев республикада муддатидан олдин президентлик сайловини ўтказиш тўғрисидаги фармонни имзолади ва овоз бериш санаси 2024 йил 7 февраль деб белгилади. Навбатдаги президентлик сайловлари 2025 йил октабр ойида бўлиб ўтиши керак эди. Сайловларни қолдириш сабаблари ҳақида маълумот берилмаган.
Озарбайжоннинг амалдаги Конституциясига кўра, мамлакат Президенти етти йил муддатга сайланади, муддатлар сони бўйича ҳеч қандай чекловлар йўқ. Озарбайжонда сўнгги президентлик сайловлари 2018 йилнинг апрель ойида бўлиб ўтди, Алиев ғалаба қозонди.
