Самарқанд вилояти Каттақўрғон туманида тергов ҳибсхонасида сақланаётган 35 ёшли фуқаро вафот этди. Расмий маълумотга кўра, у соғлиғи ёмонлашгани сабабли шифохонага олиб борилаётганда ҳаётдан кўз юмган.
Ички ишлар вазирлиги матбуот хизматининг хабар беришича, ҳодиса 21 феврал куни соат 17:35 атрофида Каттақўрғон туманидаги 7-сонли тергов ҳибсхонасида содир бўлган. Қайд этилишича, 1991 йилда туғилган фуқаро Х.Қ. прокуратура томонидан Жиноят кодексининг 168-моддаси 3-қисми “в” банди ҳамда 28-, 211-моддалари 1-қисми билан айбланиб қамоққа олинган бўлган.
Унинг аҳволи кескин ёмонлашгани сабабли тиббиёт муассасасига олиб бориш вақтида, соат 18:00 ларда вафот этган. Бирламчи суд-тиббий хулосага кўра, ўлим сабаби “2-тип қандли диабетнинг оғир асоратлари” деб кўрсатилган ва танасида жароҳат излари аниқланмаган.
Шунингдек, вазирлик маълумотида таъкидланишича, 18 феврал куни айбланувчи касаллиги сабабли шифохонага олиб чиқилган, қариндошларига хабар берилган ва у ерда учрашув ташкил этилган. Шифокорлар хулосасига кўра аҳволи қониқарли деб топилгач, 20 феврал куни ҳибсхонага қайтарилган.
Ҳозирда ҳолат прокуратура органлари томонидан ўрганилмоқда.
Доллар турбулентлик босқичига кирмоқда
Умрага бориш 19 мартдан расман тўхтатилади
Трамп: "Менга мамлакатни вайрон қилиш ҳуқуқи берилган”
