Ҳиндистон расмийлари Нью-Деҳлидаги Қизил қалъадаги портлашни теракт сифатида баҳолади

Ҳиндистон ҳукумати Нью-Деҳлидаги тарихий Қизил Фортда автомобиль портлатиб юборилишини теракт сифатида тан олиш ҳақидаги резолюцияни қабул қилди.

Бу ҳақда Ҳиндистон бош вазири Нарендра Модининг идораси хавфсизлик масалалари бўйича вазирлар маҳкамаси йиғилиши якунлари бўйича маълум қилди.

Ҳукумат қарорида қайд этилишича, мамлакат “Қизил қалъада автомобилни портлатиб юбориш орқали антимиллий кучлар томонидан содир этилган даҳшатли террорчилик ҳаракати”га гувоҳ бўлган.

Вазирлар Маҳкамаси терговни ўта зудлик билан ва профессионаллик билан олиб бориш, барча айбдорлар, шериклар ва ҳомийлар зудлик билан аниқланиб, жавобгарликка тортилишини таъминлашни буюрди.

Қарорда вазият доимий равишда ҳукумат томонидан юқори даражада кўриб чиқилаётгани таъкидланган.

Эслатиб ўтамиз, 10 ноябрь оқшомида Ҳиндистон пойтахтидаги Ред Форт метро бекати яқинида (худди шу номдаги диққатга сазовор жой яқинида – таҳр.) миналаштирилган автомобиль портлаган эди. Сўнгги маълумотларга кўра, ҳодиса оқибатида 13 киши ҳалок бўлган, 20 дан ортиқ киши жароҳатланган. Теракт юзасидан тергов ишлари Миллий тергов бюросига топширилди.