Ҳақиқий даҳшат! Самарқандда эркак ҳомиладор хотинини тириклай кўмгани маълум бўлди

Самарқанд вилояти Каттақўрғон туманида аёлини чуқурга тириклайин кўмиб, устига машина билан ёпган ва ўлдириш билан қўрқитган эрга суд ҳукми ўқилди. “Дарё” мухбири ушбу ҳолат билан боғлиқ суд ҳужжатларини ўрганди.

Маълум қилинишиича, бундан аввал муқаддам уч маротаба судланган, 1995-йилда туғилган Аҳтам Нарзиев (исм шарифлар ўзгартирилган) 2019-йилда Эътибор Элбекова билан қонуний никоҳдан ўтган. Улар турмуши давомида 3 нафар фарзандни дунёга келтиришган.

Эр-хотин ўртасида тез-тез оилавий келишмовчилик ва жанжаллар бўлиб турган. 2021-йил апрел ойининг бошларида Аҳтам уйга маст ҳолда кириб келади. Табиийки, бу ҳолатда арзимаган нарсадан яна жанжал келиб чиқади. Бундан ғазабланган эр аёлни дўппослаб, турли жароҳатлар етказади. Бу ҳам етмаганидек, уни уйнинг томорқасига олиб чиқиб, қўлига белкурак бериб, чуқур қазишни буюради. Эътибор ҳомиладор эканини ва қийналаётганини айтишига қарамасдан Аҳтам уни яна уриб, “чуқур ковламасанг, ўлдираман” дея таҳдид қилади. Эътибор қўрққанидан тахминан 4–5 соат давомида икки метрли чуқурни қазишга мажбур бўлади.

Шундан сўнг, Аҳтам аёлини чиқариб олиш ўрнига бўйнигача тупроқ ташлаб, устига “Жигули” русумли автомобили билан ёпиб қўйган. Жабрланувчи уч кун давомида овқат ва сувсиз ҳолда қолиб, ҳушидан кетган.

Эътиборнинг айтишича, у ўзига келганида уй ичида бир аҳволда ётган. Аммо шундай бўлса-да, турмуш ўртоғи уни яна уриб, ташқарига олиб чиқиб, чуқурни кўмишни буюрган. Аёл ҳолсиз ва кучсиз ҳолатда эканини тушунтиришга ҳаракат қилади. Аммо у эшитишни истамайди.

“Шу пайт олдимизга итимиз айланиб келди. Шунда у итининг оғзини селлофан билан ёпиб, пичоқлади ва менга кўрсатиб, агар айтганини қилмасам итнинг кунини бошимга солишини билдириб, ўлдириш билан қўрқитди. Қўлидаги пичоқ бўлгани учун мени ўлдириши мумкинлигини ўйлаб, жуда қаттиқ қўрқдим. Ортиқча гапирмасдан ўрани тош билан тўлдирдим ва устига тупроқ ташладим. Шунча йил болаларимни ўйлаб, бу ҳақда бирор-бир кишига айтмадим, айтолмадим”, дейди Эътибор кўзда ёш билан.

Турли зўравонлик, хўрлик ва таҳқирланишларда чарчаган аёл 2025-йилнинг 2-феврал куни навбатдаги жанжаллардан бирида жаҳл устида турмуш ўртоғининг устидан туман Ички ишлар бўлимига арз қилади. Суд жараёнида Эътибор турмуш ўртоғига нисбатан моддий томондан даъвоси йўқлигини, чора кўришни сўрашга қўрқишлиги ва шу сабабли даъво қилмаслигини билдирган.

Эркак судда айбига иқрорлигини ва чин дилдан пушаймонлигини, жабрланувчининг даъвоси йўқлигини инобатга олиб, суддан озодликдан маҳрум қилиш билан боғлиқ бўлмаган жазо тайинлашни сўраган.

Бироқ суд ҳукми билан Аҳтам Нарзиев Жиноят кодексининг 138-моддаси (зўрлик ишлатиб, ғайриқонуний равишда озодликдан маҳрум қилиш) 2-қисми “а, б” бандлари ва 112-моддаси (ўлдириш ёки зўрлик ишлатиш билан қўрқитиш) 1-қисмида назарда тутилган жиноятларни содир қилганликда айбли деб топилди. Унга нисбатан 3 йил 3 ой озодликдан маҳрум қилиш жазоси тайинланди. Жазони қаттиқ тартибли колонияда ўташ белгиланди.