Грузия суди Михаил Саакашвилини яна 4,5 йиллик қамоқ жазосига ҳукм қилди

Грузия суди Михаил Саакашвилини яна 4,5 йиллик қамоқ жазосига ҳукм қилди, энди унинг умумий жазо муддати 12,5 йилни ташкил этади.

Бу ҳақда Грузиянинг Мтавари телеканали хабар бермоқда.

Саакашвилига янги жазо муддати “давлат чегарасини ноқонуний равишда кесиб ўтиш” айблови учун берилди. Эслатиб ўтамиз, Саакашвили Украинадан Грузияга Поти порти орқали қайтиб келган эди.

Аввалроқ Грузия суди собиқ президентни давлат маблағларини талон-торож қилишда айблаб, 9 йиллик қамоқ жазосига ҳукм қилган эди. Бундан ташқари, Михаил Саакашвили депутат Валери Гелашвилини калтаклаш ва “Грузия бирлашган банки” ходими Сандро Гиргвлиани қотилларини афв этиш билан боғлиқ ишлар бўйича 6 йиллик қамоқ жазосини олган эди.

Саакашвили барча ҳукмларни сиёсий мотивга эга деб ҳисоблайди ва “Грузия орзуси” партияси уни умрбод қамоқда қолдиришни хоҳлаётганини таъкидламоқда.

Ҳозирда Саакашвилига 2007 йилда Тбилисидаги намойишни куч билан тарқатиш ва Имеди телекомпаниясини эгаллаб олиш бўйича яна бир иш кўриб чиқилмоқда.