Global Sumud халқаро флотилиясининг Тунисдан Ғазога жўнаб кетиши қолдирилди

Global Sumud халқаро ташаббуси, кемаларнинг Тунисдан Ғазога жўнаши техник ва логистика сабабларга кўра 10 сентябрга қолдирилганини маълум қилди.

Бу ҳақда Facebook’даги Sumud Flotilla саҳифасида флот аъзоларидан бири эълон қилган видеомурожаат орқали айтилди.

Баёнотда таъкидланишича, кечиктириш “Флотнинг Испаниядан келишининг кечикиши, об-ҳаво ва денгиз шароити, шунингдек, кемаларнинг ҳолати билан боғлиқ бошқа логистика омиллари” сабаб бўлган.

Дастлаб пойтахтнинг Сиди Боу Саид портидан жўнаб кетиши керак бўлган кемалар энди 10 сентябр, чоршанба куни денгизга йўл олади. Ташкилотчиларнинг таъкидлашича, расмий ва оммавий хайрлашув маросими ҳам шу куни бўлиб ўтади, Испания кемаларини кутиб олиш тадбирлари эса бугун ўтказилади ва барча тунисликлар иштирок этишга таклиф этилган.

Фаластин билан бирдамлик ва Исроил блокадасини бузиш мақсадида ташкил этилган Global Sumud халқаро фуқаролик-гуманитар флотилияси 44 дан ортиқ давлат фаолларини бирлаштиради. 31 август куни кемалар Испаниянинг Барселона шаҳридан Ғазога йўл олган эди. Ўша куни 300 тонна гуманитар ёрдам олиб кетаётган бир нечта кема Ўртаер денгизи орқали флотилияга қўшилиш учун Италиянинг Генуя шаҳридан жўнаб кетди.

Кемалар яқин кунларда Исроил блокадасини бузиш учун Ғазо томон ҳаракатини давом эттириши кутилмоқда.