Германия Украинада ядровий хавфсизлик учун МАГАТЭга 1 миллион евро ажратади

«Жанглар олиб борилаётган ҳудудларда жойлашган атом электр станциялари жиддий қўшимча таҳдидларга дуч келмоқда. Бу Россия томонидан эгаллаб олинган Запорожье АЭСига, шунингдек, ишлаб турган Украина АЭСларига ва Чернобиль АЭСи ҳудудига ҳам тааллуқли. Чернобиль АЭСида ҳимоя иншооти дрон зарбаси натижасида жиддий зарар кўрган», — деди Германия Атроф-муҳит вазирлигининг парламент давлат котиби Рита Шварцелюр-Суттер МАГАТЭ конференциясида.

Шу муносабат билан, «Украина АЭСларида хавфсизликни таъминлаш» ва «ядровий хавфсизликнинг оғир вазияти» шароитида Берлин Атом энергияси бўйича халқаро агентликка (МАГАТЭ) 1 миллион евро ажратади.

Шварцелюр-Суттер Россияни Украинадаги урушни тўхтатишга чақирди. Шунингдек, у халқаро ҳамжамиятни 2025 йил февраль ойида дрон зарбасидан зарарланган Чернобиль АЭСининг 4-энергоблоки устидаги Янги хавфсиз конфайнмент (НБК) — ҳимоя аркасини таъмирлаш ишларида иштирок этишга чақирди.

Украина расмийларининг маълум қилишича, Чернобиль АЭСига зарба берган дрон Россияники бўлган. Россия расмийлари эса буни рад этмоқда.

Шварцелюр-Суттернинг айтишича, таъмирлаш ишларида Германия ташаббусни ўз қўлига олади ва 50 миллион евро ажратиш ниятида.