Германия саноати Хитой босими остида инқирозга юз тутмоқда

The Wall Street Journal нашрининг ёзишича, Хитой компаниялари билан кучайиб бораётган рақобат туфайли Германия саноати ҳар ой 10 мингтадан ортиқ иш ўрнини йўқотмоқда. 2022 йил февралидан 2026 йил бошига қадар мамлакатда саноат ишлаб чиқариш ҳажми тахминан 10 фоизга, энергия ресурсларини кўп талаб қилувчи тармоқларда эса 15 фоиздан кўпроққа камайди.

Германия ўн йилликлар ичида биринчи марта Хитойга экспорт қилганидан кўра кўпроқ илғор саноат товарларини импорт қила бошлади. 2026 йилнинг биринчи чорагида Германия ускуналарининг Хитойга экспорти 2025 йилнинг шу даврига нисбатан тахминан 30 фоизга тушиб кетди.

Берлиннинг Пекин билан савдо баланси 2024 йил июлидан 2025 йил августигача бўлган даврда тахминан 750 миллион евролик профицитдан 500 миллион евролик дефицитга ўтди.

Иқтисодчиларнинг қайд этишича, немис фирмалари учун ўз мавқеини сақлаб қолиш қийинлашмоқда. Бунга энергия ресурсларининг юқори нархи, Европадаги талабнинг пастлиги ҳамда Хитойдаги дефляция сабаб бўляпти ва дефляция туфайли ушбу мамлакатдан келаётган маҳсулотларнинг экспорт нархи янада арзонлашмоқда.

Айниқса, ишлаб чиқариш ҳажми муҳим бўлган тармоқларда фаолият юритаётган немис компаниялари Хитой билан рақобатда энг кўп қийинчиликларга дуч келяпти. Бозорнинг жуда аниқ, ихтисослашган ва махсус қисмларида ишлайдиган Германия корхоналари эса ҳозирча барқарорроқ фаолият юритмоқда, дейилади хабарда.