Ғарбий Соҳилда CNN ходимларига ҳужум қилгани учун тўрт нафар кўчманчи ҳибсга олинди

Ғарбий Соҳилда CNN ходимлари ҳам кирадиган журналистларга ҳужум қилгани учун тўрт нафар кўчманчи ҳибсга олинди.

Бу ҳақда CNN Исроил полициясига таяниб хабар бермоқда.

Ҳужум пайтида журналистлар Рамаллаҳ шимолидаги Синжил қишлоғи яқинида бўлиб, ўтган йилнинг июль ойида кўчманчилар томонидан фаластинлик Сеиф Мусалетта ўлдирилганининг биринчи йиллигини хотирлаш учун репортаж суратга олишган.

Канал маълумотларига кўра, CNN экипажи ва бошқа журналистлар кетишга уринганларида, тўрт нафар кўчманчидан иборат гуруҳ ўз машиналарида йўлни тўсиб қўйишган. Улар болғалар, ёғоч ва металл таёқлар ва тошлар билан қуролланиб, журналистларни олиб кетаётган транспорт воситаларига бостириб киришга уринишган.

Полиция ва Исроил аскарлари воқеа жойига етиб келишган, тўрт гумонланувчини ҳибсга олишган ва жиноятда ишлатилган қуролларни мусодара қилишган.

"Исроил полицияси ва Исроил мудофаа кучлари ҳар қандай зўравонлик ёки мулкка етказилган зарарни, айниқса, бу оммавий ахборот воситалари ходимлари ўз ишларини бажариши билан боғлиқ бўлса, жуда жиддий қабул қилади", дейилади полиция баёнотида.

Исроил раҳбариятининг зўравонликка қарши чораларни кучайтириш ҳақидаги баёнотларига қарамай, Ғарбий Соҳилда ҳудуд бўйлаб аҳоли пунктларининг кенгайиши фонида кўчманчилар тажовузи кучайган, деб таъкидлайди канал.