FT: АҚШ ва “Путиннинг дўсти” Европада “Шимолий оқим-2” газ қувурини қайта ишга тушириш устида ишлаяпти

"Бу жараён Доналд Трампнинг Москва билан яқинлашиши кўламини намоён қилмоқда", деб ёзади Financial Times.

Манбаларга кўра, битим ташаббускори Маттиас Варниг бўлиб, у Шарқий Германияда Штази махсус хизмати офицери бўлган ва Владимир Путиннинг дўсти саналган шахсдир. Варниг 2023 йилгача “Шимолий оқим – 2” газ қувурининг “Газпром” таркибидаги бош компанияга раҳбарлик қилган.

FT суҳбатдошларининг айтишича, Варнигнинг режаси Трамп жамоаси билан алоқалар ўрнатиш, Украинадаги урушни тугатиш бўйича норасмий музокаралар ўтказиш ва буни АҚШ-Россия иқтисодий алоқаларини чуқурлаштиришни назарда тутади. Бунинг учун Америка бизнес доиралари воситачилик қилиши кўзда тутилган.

Вашингтондаги расмийларнинг маълум қилишича, Трамп маъмуриятининг айрим аъзолари ушбу ташаббусдан хабардор ва буни Москва билан муносабатларни тиклаш бўйича саъй-ҳаракатларнинг бир қисми сифатида кўрмоқда. Жамоа қувурни "Украинада тинчлик ўрнатиш бўйича музокараларда фойдаланиш мумкин бўлган стратегик актив" деб баҳоламоқда.

"АҚШлик инвесторлар консорциуми “Газпром” билан санкциялар олиб ташлангандан кейин кучга кирадиган дастлабки келишув шартларини аллақачон ишлаб чиққан. Евроиттифоқнинг юқори мартабали амалдорлари бу музокаралардан хабардор бўлиб, бир қатор Европа давлатлари раҳбарлари бундан хавотир билдирган. Қўшма Штатлар бу орқали Европанинг энергия таъминоти устидан мисли кўрилмаган таъсирга эга бўлиши мумкин, айниқса, Европа мамлакатлари Россия газига қарамликни камайтирган ҳозирги даврда бу жуда ҳам долзарб ҳисобланади", деб ёзади Financial Times.

Бироқ буларнинг барчаси учун АҚШ Россияга қарши санкцияларни бекор қилиши, Германия эса Европадаги харидорларга газ транзитига рухсат бериши лозим.

Шу билан бирга, Варниг FT нашрига америкалик сиёсатчилар ёки тадбиркорлар билан музокараларда иштирок этмаётганини ва АҚШ санкциялари остидаги шахс сифатида барча тегишли қоидаларга риоя қилаётганини айтган.