Францияда болаларга ижтимоий тармоқларни тақиқловчи қонун бекор қилинди

Конституциявий кенгаш ушбу ҳужжат фуқароларнинг ҳуқуқларини бузади деган хулосага келди.

Reuters агентлиги хабар беришича, мазкур ҳужжат шу йилнинг 1 сентябридан кучга кириши керак эди.

Қонун лойиҳасида 15 ёшдан кичик бўлган шахсларга ижтимоий тармоқларда саҳифа (аккаунт) очишни тақиқлаш кўзда тутилганди. Платформалар олдин очилган профилларни тўрт ой муддат ичида ўз томонидан блоклаши лозим эди. Шунингдек, интернет-сервислар зиммасига фойдаланувчиларнинг ёшини мажбурий текшириш тизимини жорий этиш вазифаси юклатилаётганди.

Бироқ Франция Конституциявий кенгаши қонун лойиҳасида ёшни тасдиқлаш қайси шартлар ва чекловлар асосида амалга оширилиши аниқ белгиланмаганини маълум қилди. Бундан ташқари, ҳужжат инсонларнинг шахсий ҳаёт дахлсизлиги, сўз ва ахборот алмашинуви эркинлиги ҳуқуқларига зид экани таъкидланди.

Франция қонун чиқарувчилари ушбу ҳужжатни шу йилнинг июл ойида маъқуллаган эди. Агар қонун кучга кирганида, Франция ижтимоий тармоқлар учун ёш чекловларини жорий этган Европадаги биринчи давлатга айланиши мумкин эди. Бундан аввал худди шундай тақиқлар Индонезия, Туркия, БАА ва Малайзия каби қатор мамлакатларда қабул қилинганди.