Франция ЖЧ-2026 ни бойкот қиладими?

Франция спорт вазири Марина Феррари 2026 йилги Жаҳон чемпионатини бойкот қилиш эҳтимоли ҳақидаги саволларга жавоб берди.

Эслатиб ўтамиз, бўлажак мундиал АҚШ, Канада ва Мексика мезбонлигида ўтади.

"Ҳозирги босқичда вазирлигимиз томонидан ушбу йирик мусобақани бойкот қилиш истаги йўқ. Албатта, келажакда нималар бўлишини олдиндан айта олмайман. Мен спорт ва мусобақаларни сиёсатдан ажратиш тарафдориман. Лекин айрим сиёсий блоклар томонидан бойкот борасида янграётган фикрларни эшитдим. Жаҳон чемпионати — барча спортсеварлар учун жуда муҳим воқеа", — деди Феррари RMC Sport нашрига берган интервьюсида.

Аввалроқ, Европанинг бир қатор терма жамоалари ЖЧ-2026 ни бойкот қилиши мумкинлиги ҳақида хабарлар тарқалган эди. Бунга Европа Иттифоқи раҳбарияти ва АҚШ президенти Дональд Трамп ўртасидаги сиёсий зиддият сабаб бўлмоқда. Хусусан, Трампнинг Данияга тегишли бўлган Гренландия оролини АҚШга қўшиб олиш ниятини эълон қилиши вазиятни кескинлаштириб юборган.