Фон дер Ляйен Украинага қишда «тарихдаги энг кучли ёрдам»ни ваъда қилди

Европа комиссияси раиси Урсула фон дер Ляйен Украинага келаётган қиш мавсумида «бутун тарихдаги энг кучли ёрдам» кўрсатилишини ваъда қилди.

У Европа парламентида Европа Иттифоқидаги вазият ҳақидаги йиллик мурожаати чоғида: «Ҳамкорларимиз билан биргаликда гуманитар ёрдам кўрсатамиз, Украинага электр энергияси ва иссиқлик етказиб беришни кучайтирамиз. Бундан ташқари, Украинанинг ҳаво мудофаасини мустаҳкамлаймиз», — деди.

Фон дер Ляйеннинг таъкидлашича, АҚШда ишлаб чиқарилган Patriot ҳаво мудофаа тизимларини Киевга зудлик билан етказиб бериш зарур.

Бироқ у Европанинг битта етказиб берувчига қарамлигини камайтириш муҳимлигини ҳам қайд этди. Шу мақсадда Европа Иттифоқи Украина билан биргаликда ҳамёнбоп, модулли ракетага қарши мудофаа тизимини ишлаб чиқишни режалаштирмоқда. Унинг асосий элементларидан бири Украинада ишлаб чиқилаётган Freyja лойиҳаси бўлиши керак.

Европа комиссияси раҳбари, шунингдек, Европа хавфсизлик кенгашини ташкил этиш режасини маълум қилди. Ушбу формат доирасида Европа Иттифоқи давлатлари раҳбарлари Канада, Норвегия, Украина ва Буюк Британия каби ҳамкор давлатлар раҳбарлари билан мунтазам учрашиб бориши кўзда тутилмоқда.