Фигу: «Реал»нинг мақсади — «Барса»ни мағлуб этиш»

«Реал» собиқ футболчиси Луиш Фигу «қироллик клуби»нинг янги мавсумдаги вазифалари ҳақида гапирди.

«Менимча, клуб одатдагидек, ўтган мавсумдан сўнг кучсизроқ бўлган чизиқларни мустаҳкамлаш учун ҳаракат қилади. Шунингдек, сўнгги йилларда жуда муҳим бўлган Модричнинг кетиши жамоага қандай таъсир қилади? Бунга ҳам эътибор беришимиз керак.

Шунга қарамай, мақсад — «Барселона»ни мағлуб этиш ва чемпионатда ҳамда қолган мусобақаларда яна ғолиб бўлиш», — деди «Реал» ва «Барселона»нинг собиқ футболчиси.

Шунингдек, Фигу мадридликларнинг ўтган мавсумдаги омадсизликларини мотивация муаммоси билан боғламаслигини таъкидлади.

«Мен йигитларда ғалабага чанқоқлик етишмади деб айта олмайман. «Реал» учун ўйнаётганингда сен ҳар доим барча совринларни қўлга киритиш учун ўйнаётганингни англашинг керак.

Шу билан бирга унвонларга эришиш ва қолганлардан яхшироқ бўлиш учун сенда мотивация, иштиёқ ва меҳнатсеварлик бўлиши шарт», — деди португалиялик.