Халқаро футбол федерацияси (ФИФА) тарихда илк марта жаҳон чемпионати саралаш босқичига футболчиларини юборган барча клубларни ҳам тўғридан-тўғри мукофотлашини маълум қилди. Бу ташаббус футбол тарихида мисли кўрилмаган ҳолат сифатида қайд этиляпти.
Федерация раҳбарияти бу мақсад учун ажратилган маблағни эълон қилди – жами 355 миллион доллар. Бу сумма ЖЧ-2022 билан боғлиқ дастурдаги тўловлардан қарийб 70 фоизга кўп. Ўшанда клубларга фақат чемпионатнинг асосий босқичига йўл олган ўйинчилар учун компенсация тўланган эди.
Энди эса вазият мутлақо ўзгарди. Саралаш баҳсларига ўз футболчиларини юборган барча клублар ҳам молиявий қўллаб-қувватлашдан баҳраманд бўлади. Бу эса турли қитъалардаги йирик клублардан тортиб, кичик жамоаларгача ислоҳотдан манфаат олиши мумкинлигини англатади.
Мутахассисларнинг таъкидлашича, бундай қарорнинг қабул қилиниши ФИФА ва Европа клублари ассоциацияси ўртасидаги узоқ музокаралар самараси бўлди. Бу жараёнда клубларнинг манфаатлари, молиявий юки ҳамда футболчиларнинг халқаро ўйинлардаги иштирокини қўллаб-қувватлаш масаласи асосий ўрин тутган.
Шу орқали ФИФА нафақат миллий терма жамоаларга, балки уларнинг асосий устуни саналган клубларга ҳам қўшимча рағбат беришни мақсад қилмоқда. Чунки футболчи қайси терма жамоа шарафини ҳимоя қилишидан қатъи назар, унинг тайёргарлиги, салоҳияти ва жисмоний ҳолати клублар фаолияти билан бевосита боғлиқ.
Шунингдек, янги дастур футбол оламидаги клублар ва ФИФА ўртасидаги муносабатларни янада мустаҳкамлайди, деган умидлар билдирилмоқда.
Яқин келажакда футболчиларнинг халқаро ўйинларда иштирок этиши нафақат миллий шараф, балки клублар учун ҳам қўшимча даромад манбаи бўлиб хизмат қилади.
Наоя Иноуэ: "Бу Муроджоннинг шарофати билан эди"
Қойилмақом ўйнаган Ҳусанов неча баллга лойиқ кўрилди? (Фото)
Ўзбекистон Японияга йирик ҳисобда мағлуб бўлди
