«Фаластинликлар яшашга ҳақли»: Германия канцлери Исроилни қаттиқ танқид қилди

Германия канцлери Фридрих Мерц Исроилнинг Ғазо секторидаги ҳаракатларини «қабул қилиб бўлмайдиган» деб баҳолаб, уларни очиқ танқид қилди. У бу ҳақда кеча Германия телевидениесида чиқиш қилиб, шундай деди:

«Исроил ҳукумати Ғазо секторида бир неча ҳафталик амалиётлар олиб бормоқда — бу менга ёқмайди».

Мерцнинг айтишича, у бу масалани бир неча бор Исроил бош вазири Биньямин Нетаньяҳу билан муҳокама қилган. Шунингдек, у қўшимча қилди:

«Умид қиламанки, биз — европаликлар ва америкаликлар биргаликда ечим топа оламиз. Бу ечим охир-оқибатда икки давлат тузилишига олиб келади».

Бироқ, Нетаньяҳу мустақил Фаластин давлати ташкил этилишига қатъий қарши эканини маълум қилган.

Мерц сўзининг якунида таъкидлади:

«Фаластинликлар ўзлари яшайдиган жойга эга бўлишга ҳақли. Ғазода бўлаётганлар эса ҳеч қандай ҳолда қабул қилиниши мумкин эмас».