Фаластинлик журналист кунига бир маҳал овқатланаётганини айтди

Фаластинлик мухбир Бисан Овда Ғазодаги вазият тобора чидаб бўлмас даражага етганини маълум қилди.

Унинг сўзларига кўра, жиноятчи Исроил кучлари озиқ-овқат ва сув таъминотини тўхтатиб қўйган ва фаластинликлар бошпана излаш имкониятига эга бўлмаса-да, доимий эвакуация буйруқларини бермоқда.

"Борадиган жойимиз йўқлиги сабабли вазият янада оғирлашаётганини ҳис қиляпмиз. Оммавий қирғиннинг бошида уйимдан қочиб, Ал-Шифо шифохонасига бордим. У ерда оилам билан боғда бир ой яшаб, кўчирилган эдик. Ҳозир турган жойим эвакуация қилинса, қаерга боришимни билмайман. Исроил армияси баъзида кунига бир неча марта эвакуация буйруқларини эълон қилмоқда," - деди Овда Al Jazeera телеканалига.

"Икки ҳафтадан бери кунига бир маҳал овқатланаяпман, чунки Исроил 77 кундан буён Ғазога озиқ-овқат киритишни тўхтатиб қўйган. Тасаввур қилинг - шифокорлар, ҳамширалар, фуқаро муҳофазаси ходимлари, барча фавқулодда вазиятлар хизматчилари шу аҳволда яшашмоқда. Биз ҳолдан тойганмиз, жуда чарчаганмиз, тўйиб овқатланолмаяпмиз, оилаларимиз бошпанасиз қолган. Буларнинг барчасига қуруқ қўл билан дош бераяпмиз," дея у сўзига қўшимча қилди.