Европа Украина ҳаво ва денгиз ҳудудини назорат қилишга тайёрланмоқда!

Европа Украинага юбориш учун авиация ва ҳарбий-денгиз кучларини тайёрламоқда.

The Washington Post манбаларига кўра, Европа Украинани назорат қилиш учун авиация ва ҳарбий-денгиз кучларини юбориш имкониятини кўриб чиқмоқда.

Нашр хабар беришича, тинчликпарварлик миссиясини муҳокама қилиш жараёнида Европа мамлакатларининг эътибори йирик қуруқлик қўшинларини жойлаштириш қийинчиликлари туфайли ҳаво ва денгиз кучларидан фойдаланишга қаратилган. Хусусан, Украина ҳаво ҳудуди ва Қора денгизни назорат қилиш бўйича таклифлар кўриб чиқилмоқда.

Бундан ташқари, баъзи давлатлар Россия томонидан таҳдид бўлган тақдирда АҚШнинг аралашуви кафолатлари бўлмаса, ўз кучларини жойлаштиришдан воз кечди. Европа амалдорлари Вашингтоннинг ёрдамига, жумладан, ҳаво ҳужумидан мудофаа, разведка ва ҳаво транспорти бўйича қўллаб-қувватлашига умид боғламоқда.

"Истак билдирганлар коалицияси"нинг Париждаги саммити 27 март куни бўлиб ўтди. Унда 31 давлат, шунингдек, Европа Иттифоқи ва НАТО вакиллари иштирок этди.

Ушбу учрашув якунига кўра, Киевга ҳарбий, молиявий ва энергетик ёрдам кучайтирилиши, шунингдек, Россияга қарши мудофаа урушини олиб бораётган мамлакатни тиклашда кўмаклашиш эълон қилинди.

Саммит иштирокчилари Украинага қўшимча 17 миллиард евролик ҳарбий ёрдам ажратиш, Киевга 2 миллион дона артиллерия ўқ-дорисини етказиб бериш ва Европа Иттифоқига аъзо давлатлар томонидан кўрсатилаётган ёрдам Украина эҳтиёжларига мос келиши учун улар ўртасидаги ҳамкорликни яхшилаш мажбуриятини олдилар.

Бундан ташқари, Европа раҳбарлари Украина мудофаа саноати билан ҳамкорликни кучайтириш ва Украина аскарларини ҳарбий тайёрлаш бўйича Европа Иттифоқи миссиясини ривожлантиришни давом эттириш тўғрисида келишиб олдилар.