Европа раҳбарлари Трампни Путин алдаётгани ва урушни давом эттирмоқчи эканига ишонтиршмоқчи

Европа Иттифоқи етакчилари Россия музокараларга тайёр эмаслигини Трампга исботлаш орқали ундан қаттиқ санкциялар талаб қилишни режалаштирмоқда.

Европа Иттифоқи давлатлари раҳбарлари Доналд Трампнинг Россия билан тинчлик музокаралари ўтказиш уринишини расман қўллаб-қувватлади. Бироқ улар бу ташаббус ортида аниқ стратегик мақсадни кўзламоқда — агар Владимир Путин музокараларда ростдан ҳам қатнашишни истамаса, буни аниқ кўрсатиб бериш ва Трампни Москвага нисбатан янги санкциялар жорий этишга ундаш.

Франция президенти Эммануэл Макроннинг таъкидлашича, Путиннинг мақсади тинчлик эмас, Украинанинг узил-кесил таслим бўлиши. «Мен Путин тинчликни хоҳлашини ишонмайман. У фақат Украина таслим бўлишини истайди», — деди Макрон Трамп ва Зеленский билан Вашингтондаги учрашувдан олдин.

Politico нашрининг ёзишича, Европа дипломатлари Путин билан суҳбат қилиш бефойда, деб ҳисоблашса-да, АҚШ томонининг сиёсий босими орқали Россиянинг ҳақиқий ниятини очишга умид қилмоқда. Улар, шу билан бирга, агар музокаралардан натижа чиқмаса, Трампни иқтисодий босимни кучайтиришга ишонтириш осонлашишига ишонмоқда.

Ҳозирча Путин Трамп билан учрашувга розилик берган, лекин Кремл музокараларни фақат «экспертлар даражасида» бошлаш кераклигини таъкидламоқда. Россия ТИВ раҳбари Сергей Лавровнинг сўзларига кўра, ҳар қандай саммит «қадамма-қадам тайёрланиши» керак. Шу пайтда Путин Трампга Москвада учрашув ўтказишни таклиф қилган, аммо бу таклиф Зеленский томонидан рад этилган.

Агар Россия урушни тўхтатмаса, Европа АҚШ билан биргаликда янги санкциялар юргизишга тайёр. Улар орасида Трамп томонидан Ҳиндистонга 25 фоизлик божларни 50 фоизгача ошириш таҳдиди ҳам бор, бу Россия нефтини импорт қилувчи давлатга жиддий зарба бўлиши мумкин.

2025 йил август ойида Россиядан Ҳиндистонга нефт етказиб бериш ҳажми йил бошидаги ўртача кўрсаткичга нисбатан уч баравар камайгани қайд этилмоқда. Россия Ҳиндистонга таклиф этаётган ва рад этилган чегирмали нархдаги нефтни Хитой сотиб олишга тайёрлигини билдирган.