Европа Қирғизистонга мигрантлар бўйича манфаатсиз келишув таклиф қилди

Европа давлатлари Қирғизистон фуқароларини ишга қабул қилиш эвазига Бишкекдан Европа Иттифоқидан чиқариб юборилган Африка ва Осиё мамлакатларининг ноқонуний мигрантларини қабул қилишга рози бўлишни таклиф қилмоқда. Бу ҳақда Қирғизистон ташқи ишлар вазири Жээнбек Кулубаев парламентдаги чиқиши чоғида маълум қилди.

Вазирнинг таъкидлашича, Бишкек бундай келишувни қатъиян рад этмоқда. Унинг айтишича, қирғизистонликлар имконият бўлса, Европа Иттифоқи мамлакатларига ишлаш учун бориши мумкин, бироқ Европа давлатлари билан бундай келишувни муҳокама қилиш мумкин эмас.

Кулубаевнинг маълум қилишича, тобора кўпроқ қирғизистонликлар ишлаш учун Туркия ва АҚШга бормоқда. Япония ва Жанубий Кореяда ҳам Қирғизистондан келадиган ишчиларга талаб юқорилигича қолмоқда.

Шу билан бирга, Қирғизистоннинг ўзи ҳам ишчи кучига эҳтиёж сезмоқда. Шу сабабли мамлакат фуқароларини уюшган тарзда хорижга ишлаш учун юбориш кўлами қисқартирилган.

Қирғизистон Меҳнат, ижтимоий таъминот ва миграция вазирлиги маълумотларига кўра, жорий йил бошидан буён 736,6 минг нафар фуқаро хорижда меҳнат қилган. 2025 йилда бу кўрсаткич 798,4 минг нафарни ташкил этган.

Меҳнат миграциясининг асосий йўналиши Россия бўлиб қолмоқда. Март ойида у ерда 472 мингдан ортиқ қирғизистонлик бўлган. Бундан ташқари, Қозоғистонда қарийб 70 минг, АҚШда 60 минг, Туркияда 35 минг ва Германияда 20 минг нафар Қирғизистон фуқароси ишлаган.