Бу ҳақда BBC хабар бермоқда.
Европа Кенгаши Россиянинг “соя флоти”га алоқадорлиги учун россиялик жисмоний шахслар ва ташкилотларга нисбатан янги санкциялар жорий этилганини эълон қилди. Улар қаторига яна 5 нафар жисмоний шахс ва 4 та ташкилот киритилди.
Рўйхатга Россиянинг йирик нефт компаниялари — “Роснефть” ва “Лукойл” билан бевосита ёки билвосита боғлиқ бўлган бизнесменлар ҳам киритилган.
"Улар Россиядан экспорт қилинаётган хом нефт ва нефт маҳсулотларини ташувчи кемаларни назорат қилади, нефтнинг ҳақиқий келиб чиқишини яширади ҳамда тартибсиз ва юқори хавфли кема юритиш амалиётларидан фойдаланади", дейилади Европа Кенгаши матбуот релизида.
Янги чеклов чоралари, шунингдек, БАА, Вьетнам ва Россияда жойлашган, аллақачон санкцияга тушган “соя флоти” танкерларига эгалик қилувчи ёки уларни бошқарувчи компанияларга ҳам татбиқ этилади.
