Европа Иттифоқи Россияга қарши 21-санкциялар пакетини келишиб олди

Европа Иттифоқига аъзо давлатлар Украинадаги можаро муносабати билан Россияга қарши 21-санкциялар пакетини келишиб олди. Янги чекловлар энергетика, молия, криптовалюта соҳаси ва савдони қамраб олади.

Европа Кенгаши раиси Антониу Коштанинг маълум қилишича, янги пакет доирасида Россиянинг 32 та банки, бир қатор криптовалюта компаниялари ҳамда «яширин флот» фаолиятига ёрдам бераётган кемаларга нисбатан санкциялар жорий этилади.

Келишувга мувофиқ, Россия хом нефти учун белгиланган максимал нарх баррелига 44 доллар миқдорида яна 12 ой сақлаб қолинади. Бу нефть нархи ўсган тақдирда лимитнинг автоматик ошиши ва Россиянинг қўшимча даромад олишининг олдини олишга қаратилган.

Шунингдек, пакет Россиянинг молия ва криптовалюта секторларига қарши янги чекловлар ҳамда ўнлаб россиялик амалдорларни санкциялар рўйхатига киритишни назарда тутади. Бироқ айрим таклифлар Европа Иттифоқига аъзо давлатларнинг эътирозлари сабабли чиқариб ташланган ёки кейинга қолдирилган.

Хусусан, Украинадаги жанговар ҳаракатларда иштирок этган россиялик ҳарбийларнинг Европа Иттифоқига киришини кенг кўламда тақиқлаш таклифи ҳозирча ортга сурилди. Иттифоқ мамлакатлари бу ташаббус устида кейинчалик ишлашга келишиб олди.

Дипломатлар маълум қилишича, пакетни тасдиқлашдаги сўнгги тўсиқ Грециянинг позицияси бўлган. Афинага тегишли истисно асосида грек кемачилик компанияларидан бири Россиянинг Арктикадан суюлтирилган табиий газини ташишни давом эттира олади.

Бундан ташқари, Болгария Москва ва бутун Русь патриархи Кириллни активларини музлатиш ва Европа Иттифоқига киришини тақиқлашни назарда тутувчи санкциялар рўйхатига киритишга қарши чиқди. Португалия ва Франция эса Россиядан треска ҳамда Аляска минтайи импортини тақиқлаш таклифини қўллаб-қувватламади.

Европа комиссияси раиси Урсула фон дер Ляйеннинг таъкидлашича, санкциялар Россиянинг ҳарбий ҳаракатлари иқтисодий асосларини заифлаштиришда давом этмоқда. Шу билан бирга, дипломатлар 21-пакетдан кейин Европа Иттифоқининг барча 27 давлати бир овоздан қўллаб-қувватлайдиган янги санкцияларни келишиш тобора қийинлашаётганини қайд этмоқда.