Европа Иттифоқи Кенгаши Украинага 3,5 миллиард евро ажратишни маъқуллади

"Киев Украинага ёрдам жамғармасидан қарийб 3,5 миллиард евро миқдорида қайтарилмайдиган учинчи траншни олиш учун зарур шартларни бажарди", дейилади Европа Иттифоқи Кенгаши баёнотида.

Ҳужжатга кўра, бундай шартларга қайта тикланадиган энергия манбаларидан фойдаланишни кенгайтириш бўйича ислоҳот, ЕИ стандартларига мувофиқ чегарадан ўтиш тартибини соддалаштириш ва қишлоқ хўжалигини ривожлантириш, шу жумладан қишлоқ хўжалиги ерларини миналардан тозалаш ҳам киради. Қайд этилишича, ушбу тўлов билан бирга 2024 йилда Жамғарма фаолияти йўлга қўйилганидан буён Киевга ажратилган маблағларнинг умумий миқдори 20 миллиард еврога етади.

Украинага ёрдам жамғармасининг 50 миллиард евролик маблағлари тўрт йилга – 2024 йилдан 2027 йилгача мўлжалланган. Уларни Киевга грантлар ва кредитлар шаклида бериш режалаштирилган. Бу маблағлар ҳам қисқа муддатли эҳтиёжларни қондириши, ҳам Украинани қайта қуриш ва модернизация қилиш бўйича ўрта муддатли вазифаларни ҳал этиши лозим бўлади.