Эрон Ядровий қуролни тарқатмаслик шартномасидан чиқиш билан таҳдид қилмоқда

Эрон Ядровий қуролларни тарқатмаслик тўғрисидаги шартнома (NPT)дан чиқиши ва ғарб томонидан қўлланилаётган санкция босими кучайса, уранни 60 фоиздан юқори даражада бойитишни бошлаши мумкин.

Бу ҳақда Эрон парламентининг Миллий хавфсизлик ва ташқи сиёсат комиссияси матбуот котиби Иброҳим Ризоий Tasnim агентлигига берган интервьюсида маълум қилди.

Унинг таъкидлашича, Эрон ҳозирча ўз имкониятларидан тўлиқ фойдаланаётгани йўқ ва зарурат туғилса, бошқа стратегик вариантларга ҳам мурожаат қилиши мумкин.

“Босим Эронни шартномадан чиқиш, уранни 60 фоиздан юқори бойитиш, илғор сентрифугалар ишлаб чиқариш ва экспорт қилиш, ҳамда ядровий ҳамкорликни кенгайтириш ҳақида ўйлашга мажбур қилмоқда”, — деди Ризоий.

Шунингдек, у қайд этдики, Эрон ихтиёрий равишда Халқаро атом энергияси агентлиги (МАГАТЭ) билан ҳамкорлик қилиш бўйича қўшимча протокол ижросини тўхтатиб қўйган, бироқ ҳалигача NPT аъзоси ҳисобланади. Аммо ташқи босим давом этса, Теҳроннинг сиёсати ўзгариши мумкин.