Эрон хавфсизлик кучлари норозилик намойишчиларига нисбатан ўқотар қуроллардан фойдаланган

Эрон хавфсизлик кучлари норозилик намойишчиларига нисбатан ўқотар қуроллардан фойдаланган — The Guardian.

Британия нашри Эроннинг йирик шаҳарларидан биридаги касалхонадан олинган 75 дан ортиқ рентген суратини эълон қилди. Маълумотларга кўра, рентген натижалари кўз, юз, бўйин, кўкрак ва бош соҳаларига отилган 3–5 мм диаметрли ўқлардан жабрланган одамларга тегишли. Жабрланганлардан бири тирик қолган, лекин бир кўзидан айрилган.

Ўтган йил декабридан буён Эрон бўйлаб норозилик намойишлари давом этмоқда. Хавфсизлик кучлари намойишчиларга қарши кўзни ёшлантирувчи газ ва ўқотар қуролдан фойдаланиб келмоқда.

Калифорния университети тиббиёт профессори Роҳини Ҳаар жароҳатларнинг сони ва оғирлигини “дахшатли” деб баҳолаган. У яқин масофадан отилган ўқлар ўлимга олиб келиши мумкинлигини, узоқроқ масофадан отилганлари эса бир нечта одамни бир вақтнинг ўзида жароҳатлай олишини таъкидлаган.

The Guardian таҳлилида келтирилишича, турли ёшдаги 75 нафар жабрланганлардан 29 нафари юз соҳасидан, камида 9 нафари сон ва жинсий аъзолари соҳасидан жароҳатланган. Эрон ҳукумати вазият бўйича расмий изоҳ бермаган.

Human Rights Activists News Agency агентлиги ҳисоб-китобларига кўра, намойишлар давомида камида 7000 дан ортиқ одам ҳалок бўлган ва уларнинг аксариятини намойишчилар ташкил қилади.