Эрон Ташқи ишлар вазирлиги: "Теҳрон ҳали бери Вашингтон билан музокара олиб бориш ниятида эмас"

Эрон ҳозирда яқин келажакда Қўшма Штатлар билан бирон бир даражада музокаралар олиб боришни режалаштирмаяпти.

Бу ҳақда Эрон Ташқи ишлар вазирлиги вакили Эсмаил Бағайи маълум қилди.

"Эронлик экспертлар делегацияси келишувларнинг бажарилишини кузатиш учун Доҳага боради", деди у ва Вашингтон дастлабки келишувнинг 10-банди (нефть савдоси) бўйича АҚШ мажбуриятлари учун зарур рухсатномаларни берганини қўшимча қилди.

Бағайининг сўзларига кўра, 11-банднинг (Эрон активларини блокдан чиқариш) бажарилиши ҳам кузатилмоқда.

"Биз ҳали якуний келишув бўйича музокараларни бошламадик. Меморандумнинг 13-бандига кўра, якуний келишув бўйича музокараларнинг бошланиши 1, 4, 5, 10 ва 11-бандларнинг бошланиши ва амалга оширилишини давом эттиришга боғлиқ", деб аниқлик киритди Ташқи ишлар вазирлиги вакили.

Эслатиб ўтамиз, меморандумнинг биринчи бандида Ливанни ҳам қўшиб ҳисоблаганда, барча жабҳаларда урушга дарҳол ва якуний чек қўйиш кўзда тутилган. Тўртинчи хатбоши АҚШ денгиз блокадасини бекор қилиш, Эронга қарши ҳар қандай аралашувнинг олдини олиш ва 30 кун ичида юк ташишни тўлиқ тиклашга тегишли. Бешинчи хатбошига кўра, Эрон Форс кўрфази ва Уммон кўрфазида урушдан олдинги савдо кемалари юк ташишни 30 кун ичида тиклашни таъминлаши керак. Ўнинчи хатбошида санксиялар бекор қилинмагунча, АҚШ Ғазначилиги Эрон хом нефти, нефт-кимё маҳсулотлари ва уларнинг ҳосилалари экспорти, шунингдек, банк, суғурта, транспорт ва барча тегишли хизматлар учун имтиёзлар бериши белгиланган. 11-хатбошига кўра, АҚШ музлатилган ёки чекланган Эрон маблағлари ва активларини озод қилиш ва тўлиқ фойдаланиш имкониятини бериш мажбуриятини олади.