Элдор Шомуродов жамоаси мураббийсиз қолди

«Рома» Иван Юрични бош мураббий лавозимидан бўшатди.

Хорватиялик 49 ёшли мутахассис 18 сентябр куни Даниэле де Россининг ўрнига тайинланганди. Унинг қўл остида жамоа бор йўғи 12 ўйин ўтказиб, 4 ғалаба, 5 мағлубият ва 3 дуранг қайд этди.

«Биз Иван Юричга сўнгги бир неча ҳафтадаги машаққатли меҳнати учун раҳмат айтамиз. У қийин вазиятни ўта профессионаллик билан ҳал қилди ва бунинг учун ундан миннатдормиз. Келажакда унга энг яхши тилакларни тилаймиз.

Янги бош мураббий излаш аллақачон бошланган, унинг номи яқин кунларда эълон қилинади», — дейилади «Рома» хабарида.

Олдинроқ «бўрилар» раҳбарияти Роберто Манчинини мураббийликка таклиф қилмоқчи эканлиги ва Клаудио Раниери муқобил вариантлардан бири сифатида кўрилаётгани ҳақида хабар берилганди.