Дуров Луврдан ўғирланган буюмларни сотиб олмоқчи эканини маълум қилди

Telegram асосчиси Павел Дуров яна бир бор Франция ҳукуматини танқид қилиб, Лувр музейидан буюмлар ўғирланишини "мамлакатнинг таназзули" деб атади. У бу ҳақда ўзининг Х ижтимоий тармоғидаги саҳифасида ёзди.

"Луврнинг талон-торож қилиниши мени умуман ажаблантирмади. Бу илгари буюк бўлган мамлакат таназзулга юз тутганининг яна бир ачинарли белгиси. Ҳукумат эса ҳақиқий таҳдидларга қарши курашиш ўрнига одамларнинг эътиборини сохта хавфлар билан чалғитиш санъатини мукаммал даражага етказган", — дея қайд этди Telegram асосчиси.

Орадан бироз вақт ўтиб, Дуров яна бир пост қолдирди.

"Мен ўғирланган заргарлик буюмларини мамнуният билан сотиб олиб, уларни Луврга қайтараман. Албатта, мен Абу-Даби Луврини назарда тутяпман, чунки у ерда ҳеч ки ўғрилик қилмайди", — деди Дуров.