“Dili me” тахаллуси билан танилган блогер Дилшод Ўрозбоев (Назаров)га нисбатан жиноят иши қўзғатилгани ҳақида хабар берган эдик. Ушбу ҳолат юзасидан Тошкент шаҳар Ички ишлар бош бошқармаси муносабат билдирди.
Қайд этилишича, 1999 йилда туғилган таниқли блогер Дилшод Ўрозбоев (Назаров) жорий йилнинг 23 январь куни фуқаро П.А.ни уриб тан жароҳати етказган. Блогер бир неча бор терговга чақирилсада, боришдан бош тортиб юрган.
Ижтимоий тармоқларда тарқалган хабарларга кўра, блогер ўзининг куёви (синглисининг турмуш ўртоғи)ни калтаклаган. Бунга куёв П.А. блогернинг синглисини ургани сабаб қилиб кўрсатилмоқда. Қайд этилишича, Ўрозбоев (Назаров)нинг куёви у билан тенгдош.
Ҳозирча П.А. блогернинг синглисини калтаклагани ҳақида расмий маълумот берилмади.
