Chrome 20 миллиард долларга сотилиши мумкин

АҚШ Адлия вазирлиги Google'ни Chrome'ни 20 миллиард долларга сотишга мажбур қилиши мумкин.

Ҳар ой 3 миллиард одам фойдаланадиган Chrome браузери монополияга қарши иш доирасида 15-20 миллиард долларга сотилиши мумкин.
Бу ҳақда Bloomberg ёзмоқда.

Агар суд сотишга қарор қилса, бу технология гиганти учун мисли кўрилмаган босим ўлчови бўлади.

Нималар бўляпти?

Bloomberg маълумотларига кўра, АҚШ Адлия вазирлиги суд орқали Chrome браузерини мажбурий сотиш, шунингдек, қидирувларда сунъий интеллект жавоблари учун бошқаларнинг контентидан фойдаланишга чекловлар қўймоқчи. Бошқа таклифлар орасида Android операцион тизимини бошқа Google хизматларидан, жумладан Google Play иловалар дўконидан ажратиш ҳам бор.

Монополияга қарши ишнинг сабаблари

Август ойида Вашингтон округ суди Google монополияга қарши қонунларни бузган деб топди. Компания қурилма ишлаб чиқарувчилари ва браузерлар билан тузилган шартномалар орқали қидирув тизимлари бозорида монополия ўрнатди, бу эса Google Search'ни стандарт қидирув тизимига айлантирди. Суднинг таъкидлашича, миллиардлаб долларга баҳоланган бундай битимлар рақобатни чеклайди ва муқобил интернет қидирув тизимлари ривожланишига тўсқинлик қилади.

Бу Google учун нимани англатади?

Агар суд Адлия вазирлигининг таклифларини қаноатлантирса, Google ўз тузилмасида катта ўзгаришлар киритиши керак бўлади. Chrome'ни сотиш компанияни қидирув ва реклама экотизимида ҳукмронлик қилиш учун асосий воситаларидан биридан маҳрум қилиши мумкин.

Суд қарори энг йирик технологик компанияларни тартибга солиш усулларини ўзгартириб, бозорда рақобат учун кўпроқ имкониятларни очиб берадиган преседент яратиши мумкин.