Дронлар 20–22 ноябр кунлари Лейкенҳит, Милденҳолл ва Фелтвеллдаги базалар устида кўрилган, деб ёзади газета. Маълумотни АҚШ ҳарбий-ҳаво кучлари ҳам тасдиқлади.
Ҳар учала база мамлакатнинг шарқий қисмида, Шимолий денгиз соҳилида жойлашган. Дронлар ушбу ҳудудлар аҳолисига ёки муҳим инфратузилма объектларига таъсир қилмаган. Уларни ким учиргани номаълум. АҚШ ҳарбий-ҳаво кучлари дронлар душман кучларига тегишлилиги ҳақида аниқ маълумот йўқлигини билдирган.
Эслатиб ўтамиз, август ойи охирида Германия шимолидаги Фленсбург шаҳридаги саноат ҳудуди устида дронлар кузатилган эди. Bild нашри дронлар Россия агентлари томонидан Шимолий денгиздаги фуқаролик кемаларидан учирилган бўлиши мумкинлиги ҳақида ёзган эди.
