BYD ва Xiaomi етакчилар сафида, Tesla эса кучли ўнталикдан ташқарида: Хитой автомобиль бозорида нима бўлмоқда?

Tesla Хитойда электрификациялашган автомобиллар савдоси бўйича энг кучли 10 та автомобиль бренди рейтингидан чиқиб кетди.

Бу ҳақда Хитой Йўловчи автомобиллари ассоциацияси (CPCA) сайтида эълон қилинган октябрь ойи статистик маълумотларида келтирилган.

Маълумотларга кўра, компания бир ой давомида мамлакатда NEV тоифасига кирувчи (электромобиллар ва ташқи манбадан қувватланадиган гибридлар) атиги 8 817 та автомобиль сотган. Сентябрь ойида эса Tesla рейтингда тўртинчи ўринни эгаллаган эди.

Таққослаш учун, Nio октябрь ойида 34 030 та, Li Auto эса 27 018 та автомобиль сотган. Рейтингда 250 301 та автомобиль ва 22,4 фоиз бозор улуши билан BYD етакчилик қилмоқда. Иккинчи ўринни Geely (131 708 та), учинчи ўринни эса Leapmotor (83 573 та) эгаллаган.

Xiaomi Auto 50 123 та автомобиль сотиб, тўққизинчи ўриндан олтинчи поғонага кўтарилган. Компания савдоси сентябрь ойига нисбатан 25,3 фоизга ўсган. Бу энг йирик ўнта бренд орасидаги энг юқори кўрсаткичдир.

Йил бошидан буёнги статистика ҳам Tesla учун омадли бўлмаяпти. Январь–октябрь ойларида компания Хитойда 389 905 та электрификациялашган автомобиль сотган. Бу ўтган йилнинг шу даврига нисбатан 15 фоизга кам. Умумий рейтингда Tesla бешинчи ўриндан еттинчи ўринга тушиб кетган.

Xiaomi эса 336 613 та автомобиль натижаси билан яна кучли ўнталикка қайтган. BYD 1,945 миллион дона автомобиль сотган ҳолда ишончли тарзда етакчилик қилмоқда.

Шу билан бирга, октябрь ойида Хитой автомобиль бозори умумий ҳисобда йиллик нисбатда 27,1 фоизга қисқариб, 1,643 миллион донани ташкил этган. NEV тоифасидаги автомобиллар савдоси ҳам 13,7 фоизга камайиб, 1,109 миллион донани ташкил қилган.

Бироқ уларнинг улуши янги енгил автомобилларнинг умумий чакана савдосида рекорд даражага — 67,5 фоизга етган. Бошқача айтганда, савдонинг умумий ҳажми пасайишига қарамай, электромобиллар ва ташқи манбадан қувватланадиган гибридлар Хитой автомобиль бозорида тобора катта улушни эгалламоқда.