Британия партияси раҳбари Россиядан пора олгани учун қамалди

Буюк Британиянинг собиқ ислоҳотчи етакчиси Натан Гилл Россия ҳукуматидан пора олгани учун 10,5 йиллик қамоқ жазосига ҳукм қилинди.

Бу ҳақда Sky News нашри хабар бермоқда.

Қайд этилишича, Гилл ОАВ ва Европарламентдаги россияпараст баёнотлари учун ўн минглаб фунт нақд пул олган.

"Натан Гилл молиявий ва сиёсий манфаат кўзлаган ҳолда ўз ишонч ва ваколатларини суиистеъмол қилган", — дея судьянинг сўзларидан иқтибос келтиради Sky News.

Телеканалнинг қайд этишича, сиёсатчи илгари Европарламент депутати бўлган даврида 2018 йил 6 декабрдан 2019 йил 18 июлгача саккизта порахўрлик бўйича айбини тан олган.