Америкалик таниқли актриса Анжелина Жоли продюсерлик соҳасида ҳам яхши тажрибага эга. 2023 йилнинг август ойида Жоли “Тhе Outsiders” мюзиклини саҳналаштириши маълум бўлган эди. Лойиҳа устида актриса қизи билан бирга ишлади. Вивьен онасининг шахсий ёрдамчиси бўлди.
Ва ниҳоят, 11 апрель куни Нью Йоркдаги Bernard B. Jeycobs театрида мусиқали фильмнинг премьераси бўлиб ўтди. Голливуд юлдузи фарзанди билан қизил гиламда тилла рангли либосда пайдо бўлди.
“Тhе Outsiders” шоуси Фрэнсис Форд Копполанинг 1983 йилда суратга олинган “Қувилганлар” фильми асосида саҳналаштирилди.
“Ҳаяжонли воқеаларга бой мюзикл ўзликни англашда инсонлар дуч келадиган мураккаб вазиятлар ҳамда қариндошлик ва дўстлик ришталари ҳақидадир”, дейилади лойиҳа тавсифномасида.
Мазкур фильмни қайта саҳналаштиришда Жолини унинг қизи илҳомлантирди. Ла Жолла Playhousе театрида “Қувилганлар” спектаклини томоша қилган Вивьен катта таассуротлар билан уйга қайтади ва онаси билан ўз ғояларини бўлишади. Ўша кундан бошлаб Вивьен театр санъатига қизиқиб қолди ва Бродвейдаги спектаклларга тез-тез ташриф буюра бошлади.
