Бразилияда Х ижтимоий тармоғи блокдан чиқарилди

Илон Маскга тегишли бўлган Х ижтимоий тармоғи (собиқ Twitter) яна Бразилия аҳолиси учун мавжуд, дея хабар беради BBC News.

Сешанба куни Бразилия Олий суди судьяси Илон Маскнинг Х ижтимоий тармоғининг мамлакатда фаолият юритишига қўйилган тақиқни бекор қилди ва яқинда Маск судьянинг талабига кўра экстремистик аккаунтларни блоклаб, жарима тўлашни бошлади.

Бразилия Олий суди судьяси Алешандри ди Мораис Х га қўйилган тақиқнинг бекор қилиниши дарҳол кучга киришини эълон қилди ва мамлакат телекоммуникация агентлигига 24 соат ичида барча бразилиялик фойдаланувчилар учун собиқ Twitter аккаунти блокдан чиқарилишини таъминлашни буюрди.

Август ойи охирида судья ди Мораис дезинформация тарқатишда айбланган ўнг радикалларнинг аккаунтларини ўчиришдан ва мамлакатда расмий вакилни тайинлашдан бош тортгани учун собиқ Twitter га мамлакатда ишлашни тақиқлаган эди.

Илон Маск, судья ди Мораис билан зиддият пайтида уни диктатор деб атади ва сўз эркинлигига ҳужум деб ҳисоблаб, унинг талабларини бажаришдан қатъий бош тортди, аммо яқинда у орқага қайтди: Х тармоғи ди Мораис талаб қилган аккаунтларни блоклашни бошлади ва Бразилияга вакил тайинлади ҳамда ўзига берилган миллионлаб жарималарни тўлади.

Аввалроқ Бразилия суди Илон Маскнинг Х ижтимоий тармоғини (собиқ Twitter) салкам 1 миллион доллар жаримага тортган эди.