Бош прокуратура "1007" рақамли Ишонч телефони фаолияти юзасидан баёнот берди

Сўнгги кунларда ижтимоий тармоқларда Бош прокуратуранинг “1007” рақамли Ишонч телефони ишламаётганлиги ҳақида хабарлар тарқалмоқда.

Бугунги кунда, Бош прокуратура “Call centr” марказининг қисқа рақамли “1007” Ишонч телефони белгиланган тартибда ишлаб келмоқда.

Биргина, жорий йилнинг ўтган даврида “1007” Ишонч телефони орқали жами 60 мингдан ортиқ мурожаатлар қабул қилиниб, кўриб чиқиш учун тегишлилиги бўйича йўналтирилиб, қонуний ҳал қилиш чоралари кўрилмоқда.

Марказ орқали келиб тушган ушбу мурожаатларнинг 20 мингдан ортиғи бевосита прокуратура органлари томонидан кўриб чиқилиб, қонуний ҳал этилган, шундан 3 769 та мурожаатлар бўйича фуқароларнинг масалалари ижобий ҳал этилиб, қаноатлантирилган.

Йилдан йилга мурожаатларни телефон орқали қабул қилиш марказига қўнғироқ қилувчиларнинг сони кўпайганлиги ҳамда баъзи бир техник сабабларга кўра айрим ҳолларда марказ операторлари билан дарҳол боғланишда бир қатор қийинчиликлар юзага келмоқда.

Шу боис, прокуратура органларига “1007” Ишонч телефонидан ташқари, онлайн режимда “pm.gov.uz” интернет сайти ҳамда почта алоқа хизмати орқали ҳам мурожаат этиш йўлга қўйилган.

Бундан ташқари, фуқароларимизга қулай шароит яратиш ҳамда узоқ йиллардан буён ҳал этилмасдан келинаётган муаммоларига қонуний ечим топиш мақсадида ҳудудларда ҳар ойда камида икки маротаба шахсан Қорақалпоғистон Республикаси, Тошкент шаҳар ва вилоят прокурорлари ҳамда туман (шаҳар) прокурорлари томонидан мунтазам равишда сайёр қабуллар ўтказиб келинмоқда.