БМТ бош котиблигига номзодларни қидириш расман бошланди

Бирлашган Миллатлар Ташкилоти бош котиб лавозимига номзодларни излаш бошлангани ҳақида расмий баёнот берди, деб ёзмоқда Bloomberg.

БМТ Хавфсизлик кенгаши ва Бош ассамблеяси қўшма хат йўллаб, ташкилотнинг янги бош котибини сайлаш жараёнини бошлади. Ҳужжат матни ноябр ойида Хавфсизлик кенгашига раислик қилаётган Серра-Леоненинг БМТдаги доимий ваколатхонаси матбуот хизмати томонидан эълон қилинди.

Қўшма хатда муаллифлар БМТ тарихида ҳеч қачон аёл киши ташкилот бош котиби лавозимини эгалламаганидан афсусда эканликларини билдирган. Шу муносабат билан БМТга аъзо давлатларга хотин-қизлар номзодларига кўпроқ эътибор қаратиш тавсия этилди. Бундан ташқари, ҳужжатда ташкилотнинг бўлажак раҳбарини танлашда минтақавий хилма-хилликка риоя қилиш муҳимлиги таъкидланди.

БМТ Бош котиблигига номзодларни ташкилотга аъзо давлатлар кўрсатади, бир мамлакат бир нафардан ортиқ номзод кўрсатиши мумкин эмас. Расмий номзод кўрсатиш учун Хавфсизлик кенгаши ва Бош ассамблея раисларига тегишли хат юбориш талаб этилади. Ўз навбатида, номзодлар БМТни ривожлантириш бўйича ўз қарашларини, шунингдек, даромадлари тўғрисидаги маълумотларни тақдим этишлари шарт. Агар даъвогар БМТ тузилмасида ишласа, унга «манфаатлар тўқнашувига йўл қўймаслик учун сайлов кампанияси даврида ўз ишини тўхтатиб туришни кўриб чиқиш» тавсия этилади.

Бош котиб сайлови келаси йилнинг июл ойи охирида ўтказилади. Ҳозирча бу лавозимга икки номзод — МАГАТЭ (БМТ таркибидаги Халқаро атом энергияси агентлиги) раҳбари Рафаэл Гросси ва ЮНКТАД (БМТнинг савдо ва тараққиёт анжумани) бош котиби Ребекка Гринспан даъвогарлик қилмоқда.