Биткоин доллардан устунми?

Америкалик миллиардер Илон Маск биткоинни қўллаб-қувватлади. У Х (Тwиттер)да ушбу криптовалюта энергияга асосланганлигини таъкидлади.

Маскнинг фикрича, бу биткоиннинг доллар каби фиат пуллардан асосий фарқи ҳисобланади. Чунки ҳукуматлар фиат пулларни сохталаштиришлари ва чексиз миқдорда чиқаришлари мумкин.

Маскнинг баёноти ҳукуматлар пул чоп этиш орқали “сунъий интеллект соҳасидаги қуролланиш пойгаси"ни молиялаштираётгани, бу эса ўз навбатида олтин, кумуш ва биткоин нархларининг кўтарилишига сабаб бўлаётгани ҳақидаги мақолага жавоб сифатида берилди.

Zerohedge тахаллуси остидаги фойдаланувчи: “Аммо энергияни чоп этиб бўлмайди,” деб таъкидлади. Tesla ва SpaceX раҳбари бу далилга тўлиқ қўшилди.

“Тўғри. Айнан шу сабабли биткоин энергияга асосланган: сиз қалбаки фиат пулларни чиқаришингиз мумкин, тарихдаги ҳар бир ҳукумат шундай қилган, аммо энергияни сохталаштириб бўлмайди”, — дея жавоб берди Маск.

Биткоин қазиб олиш жараёни энергия талаб қилувчи жараён бўлиб, мураккаб математик муаммоларни ҳал қилувчи ҳисоблаш қувватларини таъминлаш учун катта миқдордаги электр энергиясини талаб қилади. Айнан майнинг орқали тармоқ хавфсизлиги ва тизимда янги биткоинларнинг пайдо бўлиши таъминланади.