Бир вақтлар Осиёнинг энг бой кишиси бўлган хитойлик бизнесмен умрбод қамалди

Хитой суди пайшанба куни Evergrande Group асосчиси Хуэй Ка Янни умрбод озодликдан маҳрум қилиш жазосига ҳукм қилди. Бу компания инқирозга учраб, мамлакат иқтисодиёти ва молия бозорларига жиддий таъсир кўрсатганидан беш йил ўтиб содир бўлди.

Бир вақтлар Осиёнинг энг бой кишиси бўлган Хуэй Ка Ян саккизта айблов бўйича ўз айбини тан олган. Улар орасида маблағларни мақсадсиз ишлатиш, маблағ жалб қилишда фирибгарлик, давлат депозитларини ноқонуний ўзлаштириш, ноқонуний кредит бериш, қимматли қоғозлар билан боғлиқ фирибгарлик ва пора олиш каби айбловлар бор.

Reuters маълумотига кўра, бир вақтлар Хитойнинг етакчи қурилиш компанияларидан бири бўлган Evergrande 300 миллиард долларлик мажбуриятларининг катта қисми бўйича дефолтга учраган. Компаниянинг муаммолари узоқ вақтдан бери дунёнинг иккинчи йирик иқтисодиётига салбий таъсир кўрсатаётган Хитой кўчмас мулк секторидаги инқироз рамзларидан бирига айланган.

Хитойнинг CCTV давлат телеканали маълум қилишича, пайшанба куни Evergrande билан боғлиқ жами 56 киши турли жазоларга ҳукм қилинган.

Компаниянинг активларни бошқариш маҳсулотлари бўйича миллиардлаб долларлик мажбуриятларини бажара олмагани норозиликларга сабаб бўлган. Натижада кўпчилиги кам даромадли бўлган оддий инвесторлар ўз маблағларидан айрилган.