АҚШ Украина ресурслари бўйича битим имзолашга тайёр, аммо Киев унга янги ўзгартиришлар киритишга ҳаракат қилмоқда.
Бу ҳақда АҚШ молия вазири Скотт Бессент АҚШ президенти Дональд Трамп вазирлар маҳкамасининг навбатдаги йиғилишида сўзлаган нутқида маълум қилди.
"Ҳа, бизнинг томонимиз имзо чекишга тайёр, бироқ украиналиклар кеча кечқурун шошилинч ўзгаришлар қилишга қарор қилишди", - дея журналистнинг бу борадаги саволига Бессент жавоб бериб, Вашингтон келишувни бугун имзолашга тайёрлигини тушунтирди.
Унинг аниқлик киритишича, таклиф қилинган келишувдан ҳеч қандай банд олиб ташланмаган. "Бу биз дам олиш кунлари келишиб олган шартномамиз. Биз томонда ҳеч нарса ўзгармади", деди у.
Аввалроқ, бош вазирнинг биринчи ўринбосари Юлия Свириденко яқин 24 соат ичида Вашингтон билан ер ости бойликлари бўйича келишув имзоланишини маълум қилганди.
