BBC бош директори Трампнинг 2021 йилдаги нутқи акс этган видео сохталаштирилгани сабабли истеъфога чиқди

BBC бош директори Трампнинг 2021 йилдаги нутқи акс этган видео сохталаштирилгани сабабли истеъфога чиқди — Daily Mail.

Нашрнинг хабар беришича, BBC бош директори Тим Дэйви ва янгиликлар бўлими раҳбари Дебора Тернесс BBC Panorama дастурида Трампнинг нутқини таҳрирлаш билан боғлиқ можаро туфайли истеъфога чиқишган.

"Умуман олганда BBC яхши ишламоқда. Аммо баъзи хатоларга йўл қўйилди ва бош директор сифатида мен масъулиятни ўз зиммамга олишим керак",
— дея изоҳ берди Дэйви.

Аввалроқ The Telegraph собиқ журналист Майкл Прескотт томонидан ёзилган ва BBC директорлар кенгашига йўлланган меморандумни чоп этганди. Прескоттнинг таъкидлашича, телекомпания Трампнинг 2021 йил 6 январда Капитолийга ҳужум олдидан сўзлаган нутқини сохталаштирган.

Меморандумда айтилишича, сохта видеода Трамп ўз тарафдорларига “Капитолийга бориб, жанг қилишни” айтаётгандек кўрсатилган. Аслида эса у тарафдорларига “тинч ва ватанпарварлик руҳида бориб, ўз овозларини эшиттиришга ундаш” ҳақида гапирган.

2021 йил 6 январ куни, Трамп сайловларда мағлуб бўлганидан икки ой ўтгач, унинг тарафдорлари Капитолий биносига бостириб киришганди. Бу ерда сайловларда Жо Байден ғалаба қозонганини тасдиқлаш учун конгресс йиғилиши ўтказилиши керак эди. Ўшанда тўқнашувлар оқибатида беш киши ҳалок бўлди,140 нафар полисиячи жароҳатланган.

Мазкур воқеадан сўнг Трампга қарши бир нечта жиноят ишлари очилди ва у президентликка сайланганидан сўнг бу ишлар ёпилганди.