"Барселона" YouTube`даги энг машҳур спорт ташкилотига айланди

Испаниянинг "Барселона" клуби расмий канал обуначилари сони 23,8 миллионга етганини маълум қилди.

Каталония клуби Халқаро футбол федерацияси (ФИФА, 23,6 миллион обуначи) ва Миллий баскетбол ассоциациясини (НБА, 23,3 миллион) ортда қолдириб, платформадаги энг оммабоп спорт ташкилотига айланди.

Январь ойида "Барселона" YouTube канали 20 миллиондан ортиқ обуначига эга бўлган дунёдаги биринчи спорт клуби бўлди. Мадриднинг “Реал” каналига ҳозирда 18,1 миллион, Испания Ла Лигаси 13,1 миллион, Англиянинг "Ливерпуль" клуби эса 11,7 миллион обуначига эга.

Шунингдек, "Барселона" Жоан Гампер кубоги учун "Комо"га (5:0) қарши ўйин трансляциясини YouTube’нинг 9,7 миллион ноёб фойдаланувчилари томоша қилгани, жами 18 746 962 марта кўрилгани ҳақида хабар берди. Бундан ташқари, Хитойнинг Douyin платформасида трансляция қилинган учрашувни кўришлар сони 1,2 миллиондан ошди, клуб аккаунтига эса 5000 дан ортиқ киши обуна бўлди.