«Барселона» Винисиуснинг атиги 2 ўйинга четлатилганидан норози

«Барселона» Винисиуснинг атиги 2 ўйинга дисквалификация қилинганидан норози.

«Реал» вингери Ла Лига 12-тури доирасидаги «Валенсия» (2:1) билан баҳсда рақиб дарвозабони Столе Дмитриевскини орқадан туртиб юборгани учун икки ўйинга дисквалификация қилинди. Беллашувда бразилияликка қизил карточка кўрсатилганди.

Diario Sport хабарига кўра, «Барселона» Винисиусга берилган жазо даражасидан норози бўлган ва буни 2022 йилнинг ноябрида «Осасуна» билан ўйинда қизил карточка олган Роберт Левандовскининг дисквалификацияси билан параллел келтирган. Ўшанда полшалик форвард 3 учрашувни ўтказиб юборганди, у майдонни тарк этаётиб кинояли имо-ишора билан қўлини бурнига теггизган ва бу ҳаракатни ҳакам Хил Мансано ҳурматсизлик белгиси сифатида баҳолаганди.

«Барселона» Левандовскининг ноаниқ ишораси қандай қилиб Винисиуснинг тажовузкор хатти-ҳаракатидан кўра қаттиқроқ жазоланганини тушунмаяпти. Клуб Винига нисбатан жуда юмшоқ муносабатда бўлган деб ҳисоблайди. Каталонияликларнинг фикрича, бундай қарорлар турли жамоалар футболчиларига нисбатан тенгсиз муносабат ҳиссини юзага келтиради.

Клуб вице-президенти Елена Форт ушбу вазиятни қуйидагича изоҳлади: «Бу «Барселона» ҳар куни нималарга дуч келишини кўрсатади. Бу Ҳанси Фликнинг 4 ўйинга четлатилиши билан солиштирганда номутаносибдир».