"Барселона" президенти жуда катта ваъдалар бермоқда

2026 йилда бўлиб ўтадиган “Барселона” президентлик сайловларида амалдаги раҳбар Жоан Лапорта яна иштирок этади. Агар у қайта сайланса, клубни топ даражадаги футболчилар билан кучайтиришга ваъда бермоқда. Бу ҳақда Fichajes нашри хабар берди.

Манбага кўра, Лапорта сайловолди стратегияси доирасида “кўк-анорранглилар”ни яна юқори даражага олиб чиқишни мақсад қилган. Агар у президентликка қайта тайинланса, жамоага Эрлинг Ҳоланд, Хулиан Алварес ва Бредли Барколя каби футболчиларни олиб келишни режалаштирган.

Лапортанинг асосий нишони — “Манчестер Сити” ҳужумчиси Эрлинг Ҳоланд. Бу трансфер тахминан 120 миллион евро эвазига амалга ошиши мумкин. Гарчи ҳозирги молиявий шароит бунга имкон бермаса-да, Лапорта 2026 йилгача клуб иқтисодий аҳволи яхшиланишига ишонмоқда.

Шунингдек, “Барселона” узоқ вақтдан бери аргентиналик ҳужумчи Хулиан Алваресга қизиқиб келади. Эндиликда Лапорта аргентиналик футболчини “Атлетико Мадрид”дан сотиб олишга ҳаракат қилмоқда. Бироқ трансфернинг амалга ошиши қийин кечиши мумкин: “матрасчилар” футболчи учун 100 миллион евро талаб қилмоқда.

Рўйхатдаги яна бир ном бор — “ПСЖ” футболчиси Бредли Барколя. Франциялик ёш иқтидор “ПСЖ” таркибида мунтазам ўйин амалиётига эга эмас. Шу сабабли бу трансфер нисбатан осонроқ амалга ошиши мумкинлиги тахмин қилинмоқда. Париж клуби Барколяга 80–100 миллион евро атрофида нарх белгилаган.

Маълумот учун, Жоан Лапорта 2003–2008 йиллар давомида “Барселона” президенти бўлган. У 2021 йилда иккинчи марта ушбу лавозимга сайланган. Унинг раҳбарлиги даврида клуб молиявий муаммолардан чиқишга ҳаракат қилмоқда. Хусусан, “Камп Ноу” стадионини реконструкция қилиш лойиҳаси айнан Лапорта ташаббуси билан бошланган.